Cronfa Gweithredu Hinsawdd – Ein Dyfodol Ni Canllawiau i ddatblygu eich cynnig llawn

Wrth ddatblygu eich cais llawn, dylech gyfeirio at ein meini prawf a'n blaenoriaethau ar gyfer y gronfa benodol hon, y Gronfa Gweithredu Hinsawdd – Ein Dyfodol Ni.

Os ydych chi’n ymgeisio i’r Gronfa Gweithredu Hinsawdd – Ynni a Hinsawdd, dylech gyfeirio at ein canllawiau i ddatblygu eich cynnig llawn ar gyfer Ynni a Hinsawdd.

Yr hyn y byddwn yn ei ariannu

Byddwn yn ariannu prosiectau partneriaeth sy'n cynnwys mwy o bobl mewn gwaith gweithredu ar newid hinsawdd ac yn ysbrydoli newid beiddgar a chyffrous.

Dylai prosiectau wneud hyn drwy naill ai:

cysylltu gweithredu hinsawdd â bywydau a diddordebau beunyddiol cymunedau lleol, a'u hysbrydoli i weithredu

Rydym ni am gael pobl i gymryd rhan mewn gweithredu ar newid hinsawdd trwy eu gweithgareddau rheolaidd. Gallai hyn gynnwys cymunedau maen nhw’n rhan ohonynt a chlybiau maen nhw’n eu mynychu. Neu ddiddordebau eraill fel y celfyddydau, chwaraeon ac iechyd.

Rydym ni am i brosiectau ddangos bod gweithredu ar newid hinsawdd yn gweithio orau pan fydd cymunedau yn cael dweud eu dweud. Ac i helpu cymunedau i rannu eu neges. Er enghraifft, gyda chyfoedion neu gyda sectorau eraill.
dylanwadu ar gymunedau ar lefel ranbarthol neu genedlaethol

Fel cysylltu grwpiau ar draws lleoliadau. Neu weithio gydag arbenigwyr ymgysylltu â'r cyhoedd ar ymgyrch feiddgar i ysbrydoli newid. Neu helpu cymunedau i ddylanwadu ar y bobl sy'n gwneud polisïau sy'n effeithio arnyn nhw. Gallai hyn fod mewn un wlad, neu ar draws y Deyrnas Unedig gyfan.

Er bod ein cyllid ar gael i bob cymuned, byddwn yn defnyddio dull sy'n seiliedig ar degwch. Mae hyn yn golygu y byddwn ni’n buddsoddi fwyaf mewn lleoedd, pobl a chymunedau sy'n profi tlodi, anfantais a gwahaniaethu. Nod ein gwaith yw cefnogi cymunedau i adeiladu ar eu cryfderau. Byddwn yn cefnogi'r hyn sydd bwysicaf i wahanol gymunedau, gan gynnwys buddsoddiad hirdymor i fynd i'r afael â heriau dwfn ac rydym ni am ddeall sut mae hynny wedi llunio dyluniad a gweithrediad eich prosiect.

Dylech gofio adlewyrchu hyn yn yr holl atebion yn eich cynnig llawn. Dyma ychydig mwy o wybodaeth drwy wirio'r egwyddorion cydraddoldeb ar ein gwefan

Ystyried eich effaith amgylcheddol

Rydym ni wedi ymrwymo i'ch helpu i ddiogelu'r amgylchedd. Gallwch wirio ein canllawiau ar leihau eich effaith amgylcheddol.

Mae gan ein Hwb Hinsawdd wybodaeth hefyd am ein dull o fynd i'r afael â'r argyfwng hinsawdd, gan gynnwys dysgu a mewnwelediadau, straeon a chyllid.

Sut i gyflwyno eich cynnig llawn

Mae pum cam y dylech chi eu cymryd i gyflwyno'ch cynnig llawn:

Cam 1 – ymateb i'r saith cwestiwn cais yn y ddogfen hon.
Cam 2 - casglu'r cyfrifon blynyddol diweddaraf i chi eich hun ac unrhyw bartneriaid a fydd yn derbyn cyllid.
Cam 3 – cwblhau cyllideb y prosiect gan ddefnyddio'r templed a ddarperir, gan gynnwys amcanestyniadau incwm ar gyfer unrhyw bartneriaid yn y prosiect.
Cam 4 – creu a chynnwys cynllun prosiect.
Cam 5 - llenwi ffurflen ar-lein lle byddwch yn ateb mwy o gwestiynau am eich prosiect a'ch sefydliad. Byddwn hefyd yn gofyn i chi uwchlwytho'r dogfennau rydych chi'n eu creu yng nghamau 1 i 4 ar y cam hwn.

Cam 1 – ymateb i'n cwestiynau

Bydd angen i chi baratoi'r atebion i'r cwestiynau hyn mewn dogfen Word (neu debyg). Yna dylech uwchlwytho'r ddogfen rydych chi'n ei chreu pan fyddwch chi'n cyrraedd 'Cam 5'.

Mae terfynau cyfrif geiriau ar gyfer pob cwestiwn. Ni allwn sicrhau y byddwn ni’n darllen testun sy'n mynd y tu hwnt i derfynau'r cyfrif geiriau. Ni fyddwn yn derbyn atodiadau fel papurau ymchwil neu ddogfennau gwerthuso oni bai ein bod wedi gofyn amdanynt yn benodol.

Dylech ddweud y canlynol wrthym ni:

1. Beth yw eich gweledigaeth a'ch nodau tymor hir ar gyfer eich prosiect?

Dylech ddweud y canlynol wrthym ni:

Eich gweledigaeth gyffredinol ar gyfer y prosiect
gweithgareddau y prosiect a'r canlyniadau disgwyliedig
y dystiolaeth rydych chi wedi'i chasglu i ddangos bod angen y prosiect a’i fod yn cymryd y dull mwyaf effeithiol o gael effaith
sut y bydd eich gweithgareddau'n gynaliadwy ar ôl i'r cyfnod ariannu ddod i ben

Gallwch ysgrifennu hyd at 600 o eiriau ar gyfer yr adran hon, ond peidiwch â phoeni os ydych chi'n defnyddio llai.

2. Lle a sut bydd eich prosiect yn gweithio?

Dylech ddweud y canlynol wrthym ni:

lle bydd y prosiect yn digwydd – gan gynnwys p’un a yw’n wledig, trefol neu arfordirol, ac unrhyw gyd-destun am yr ardal a'r gymuned sy'n berthnasol i'ch prosiect. Os bydd eich prosiect yn canolbwyntio ar gymuned hunaniaeth yn hytrach na lle, nodwch hyn
pwy fydd yn cymryd rhan – gan gynnwys faint o bobl, a oes unrhyw grwpiau penodol o bobl rydych chi'n edrych i weithio gyda nhw, a sut y byddwch chi'n eu cefnogi i gymryd rhan yn y prosiect
sut mae eich prosiect yn ymateb i anghenion y gymuned, ac yn diwallu ‘lle maen nhw’ pobl a chymunedau o ran gweithredu ar newid hinsawdd. (Er enghraifft, drwy ddefnyddio gweithgareddau bob dydd fel man cychwyn.)
sut mae eich prosiect yn ymateb i unrhyw amcanion y llywodraeth, cynlluniau lleol neu flaenoriaethau
unrhyw brosiectau gweithredu ar newid hinsawdd perthnasol eraill sydd wedi digwydd yn eich ardal chi yr ydych chi’n ymwybodol ohonynt neu'n ymwneud â nhw
unrhyw heriau rydych chi'n disgwyl eu hwynebu wrth gyflawni'r prosiect hwn a sut y byddwch chi'n eu goresgyn.

Gallwch ysgrifennu hyd at 800 o eiriau ar gyfer yr adran hon, ond peidiwch â phoeni os ydych chi'n defnyddio llai.

3. Sut byddwch chi'n gweithio mewn partneriaeth ag eraill i gyflawni eich prosiect?

Bydd y rhaglen ariannu hon yn canolbwyntio ar brosiectau sy'n gweithio mewn partneriaeth ffurfiol ag eraill. Rydym ni fel arfer yn disgrifio partneriaeth fel grwpiau lluosog sy'n gweithio gyda'i gilydd tuag at bwrpas cyffredin. Rydym ni’n disgwyl i bartneriaid dderbyn peth o'r arian o'r grant a bod yn gyfrifol am ddarparu rhannau o'r prosiect yn ogystal â chyd-gyfrifoldeb am lwyddiant y prosiect.

Fel arfer rydym ni’n rhoi ein cyllid i'r sefydliad arweiniol mewn partneriaeth a all wedyn dalu'r partneriaid eraill am y gwaith maen nhw’n ei wneud.

Os na fydd gan eich partneriaeth sefydliad arweiniol, gallwn hefyd dalu'r cyllid ar wahân i bob sefydliad â chytundebau grant unigol.

Os nad yw'r sefydliad arweiniol yn canolbwyntio ar yr hinsawdd neu'r amgylchedd, rydym ni’n disgwyl i o leiaf un o'r partneriaid feddu ar brofiad o waith ar newid hinsawdd neu waith amgylcheddol.

I gael rhagor o wybodaeth am ein gofynion o ran sut mae partneriaethau'n cael eu strwythuro, gweler yr adran 'Pethau eraill i'w hystyried' ar ddiwedd y ddogfen hon.

I gael rhagor o wybodaeth am ein meini prawf ar gyfer prosiectau partneriaeth, gwiriwch y wybodaeth ar ein gwefan am bwy sy’n gallu ymgeisio i’r Gronfa Gweithredu Hinsawdd – Ein Dyfodol Ni. Yn benodol, gwnewch yn siŵr eich bod yn dweud wrthym ni pwy fydd yn darparu gweithgareddau ar gyfer gwerthuso a dysgu, cyfathrebu ac unrhyw weithgareddau ymgysylltu â'r cyhoedd. Mae gennym ni ddiddordeb hefyd mewn clywed sut mae sefydliadau fel cwmnïau preifat yn cymryd rhan mewn partneriaethau, er nad ydynt yn gymwys i dderbyn cyllid.

Dylech ddweud y canlynol wrthym ni:

Pwy fydd yn rhan o'ch partneriaeth - ar gyfer pob sefydliad, dylech gynnwys y canlynol:

statws cyfreithiol eu sefydliad – gallwch ddysgu pa fathau o sefydliadau sy’n gymwys i ymgeisio
enw prif gyswllt – gan gynnwys eu rôl swydd, a manylion am eu rôl yn y bartneriaeth
strwythur y bartneriaeth a sut y bydd yn cael ei llywodraethu
sut mae'r bartneriaeth wedi dod at ei gilydd
yr hyn y bydd pob partner yn gyfrifol amdano yn y prosiect.

Dylech hefyd ddweud wrthym ni sut mae'r bartneriaeth yn gweithio ochr yn ochr â'i chymuned ehangach, sut bynnag y bo hynny'n cael ei diffinio:

sut y byddwch chi’n gweithio gyda chymunedau, sefydliadau neu grwpiau a'u cefnogi
sut mae'r bartneriaeth yn adlewyrchu'r gymuned mae'n ceisio ei chefnogi
pwy arall y gallai fod angen i chi eu helpu i gyflawni nodau eich prosiect.

Gallwch ysgrifennu hyd at 600 o eiriau ar gyfer yr adran hon, ond peidiwch â phoeni os ydych chi'n defnyddio llai.

4. Sut bydd y prosiect yn cefnogi cymunedau i gymryd rhan ystyrlon?

Byddwn yn gweithio'n arbennig gyda phartneriaethau sydd â dealltwriaeth ddofn o gymunedau, pobl a'r materion a'r buddiannau sydd bwysicaf iddyn nhw. Ac ym mhob un o'r prosiectau rydym ni’n eu cefnogi, rhaid i bobl o gymunedau gymryd rhan mewn modd ystyrlon.

Dylech ddweud y canlynol wrthym ni:

sut mae'r gymuned yn ymwneud â chynllunio, datblygu a chyflwyno'r prosiect
gyda phwy rydych chi wedi siarad â nhw neu sut rydych chi wedi gweithio gyda'r gymuned wrth ddatblygu'r prosiect hwn
sut mae'r prosiect yn ymateb i'r hyn sydd ei angen ar y gymuned, ac yn cefnogi'r hyn sy'n bwysig iddyn nhw
sut y byddwch chi’n mynd i'r afael â'r rhwystrau i gyfranogiad ar gyfer pobl a chymunedau sydd heb gynrychiolaeth ddigonol.

Gallwch ysgrifennu hyd at 600 o eiriau ar gyfer yr adran hon, ond peidiwch â phoeni os ydych chi'n defnyddio llai.

5. Sut fyddwch chi'n cynhyrchu tystiolaeth am y prosiect?

Nid oes rhaid i chi fesur na gwerthuso popeth yn eich prosiect, ond dylech ddweud wrthym ni beth fydd eich tystiolaeth yn canolbwyntio arno, pam, a sut y byddwch chi’n ei chasglu.

Cyn i chi ymateb, darllenwch yr adran 'Beth i'w ddisgwyl gennym ni' isod i ddeall ein dull o ddysgu a chasglu tystiolaeth.

Dylech ddweud y canlynol wrthym ni:

sut y byddwch chi'n cynhyrchu tystiolaeth am y gwahaniaeth rydych chi'n ei wneud
beth yw'r newidiadau rydych chi'n disgwyl eu gweld. Er enghraifft, byddwch yn benodol am unrhyw:
- newidiadau y gallwch chi eu gwerthuso i ddangos y gwahaniaeth rydych chi'n ei wneud
- cwestiynau neu faterion y gallech chi greu tystiolaeth newydd amdanynt
- dulliau neu ddatrysiadau newydd y gallwch chi eu profi
- unrhyw fesurau rydych chi'n bwriadu eu defnyddio. Fel cyfranogi ac ymgysylltu, newidiadau i gynlluniau polisi neu gynlluniau lleol, newidiadau mewn agweddau, newid ymddygiad, neu leihau carbon.

6. Sut fyddwch chi'n dysgu ac yn rhannu'r hyn rydych chi'n ei ddysgu?

Rydym ni’n disgwyl i chi gael cynllun ynghylch sut, a phryd, rydych chi'n dweud wrth eraill am yr hyn rydych chi'n ei wneud a'i ddysgu. Cyn eich ymateb, darllenwch yr adran 'Beth i'w ddisgwyl gennym ni' isod i ddeall ein dull o ddysgu.

Dylech ddweud y canlynol wrthym ni:

sut y byddwch chi’n sefydlu proses ddysgu reolaidd am y prosiect ac am y bartneriaeth
sut y byddwch chi’n sicrhau bod y dysgu hwn yn cael ei rannu'n brydlon, ac mor eang â phosibl
eich dulliau, cynulleidfaoedd a'ch dull gweithredu
sut y byddwch chi'n cynyddu cyfranogiad yn y broses ddysgu
pa brofiad neu arbenigedd sydd gan y sefydliadau yn eich partneriaeth o gynhyrchu a rhannu dysgu
pa gefnogaeth y byddech chi ei hangen gennym ni i'ch helpu i ddysgu a rhannu'r hyn rydych chi'n ei ddysgu – er enghraifft mewn arweinyddiaeth, maes technegol neu werthuso.

Gallwch ysgrifennu hyd at 500 o eiriau ar gyfer yr adran hon, ond peidiwch â phoeni os ydych chi'n defnyddio llai.

7. Sut fyddwch chi'n cyrraedd mwy o bobl?

Rydym ni am gyrraedd pobl sy'n newydd i weithredu yn yr hinsawdd a allai gynnwys defnyddio gweithgareddau a buddiannau beunyddiol pobl fel man cychwyn. Mae gennym ni ddiddordeb arbennig mewn prosiectau sy'n cynnwys pobl, lleoedd a chymunedau sy'n profi tlodi, gwahaniaethu ac anfantais gan ein bod ni’n gwybod mai dyma'r cymunedau sydd hefyd yn debygol o gael eu taro galetaf gan newid yn yr hinsawdd.

Er enghraifft, gallai eich prosiect wneud y canlynol:

cynnwys pobl sydd wedi cael eu gadael allan o'r sgwrs hinsawdd. Er enghraifft, oherwydd eu bod nhw’n newydd i weithredu ar newid hinsawdd, neu oherwydd eu bod yn dod o gymunedau sy'n profi tlodi, anfantais a gwahaniaethu.

cyflwyno persbectif hinsawdd i grŵp a ddaeth at ei gilydd mewn perthynas â diddordeb neu weithgaredd arall er enghraifft y celfyddydau, chwaraeon ac iechyd

profi'r ffyrdd gorau o ymgysylltu â gwahanol gynulleidfaoedd mewn gweithredu ar newid hinsawdd

lledaenu dull lleol cyffrous o weithredu ar newid hinsawdd drwy ei rannu'n genedlaethol.

Dylech ddweud y canlynol wrthym ni:

beth yw eich cynlluniau i ymgysylltu â chynulleidfaoedd newydd a chael mwy o bobl i gymryd rhan yn y prosiect
os byddwch yn mesur pwy sydd yn ymwneud â'ch gwaith, a phwy nad ydynt yn ymwneud â'ch gwaith
am ba brofiad sydd gennych chi a'ch partneriaid wrth wneud newidiadau i gynyddu cyfranogiad ac ymgysylltu
sut y byddwch chi’n sicrhau bod buddion y prosiect yn cael eu rhannu y tu hwnt i'r bobl a/neu'r gymuned y byddwch chi’n gweithio'n uniongyrchol â nhw – gan gynnwys pa brofiad sydd gennych chi neu eich partneriaid o wneud hyn.

Gallwch ysgrifennu hyd at 500 o eiriau ar gyfer yr adran hon, ond peidiwch â phoeni os ydych chi'n defnyddio llai.

Cam 2 - casglu eich cyfrifon blynyddol

Mae angen i chi gasglu'r cyfrifon blynyddol diweddaraf ar gyfer eich sefydliad eich hun yn ogystal â'r holl bartneriaid sy'n derbyn cyllid drwy'r prosiect hwn, a'u huwchlwytho pan fyddwch chi’n cyrraedd ‘Cam 5’.

Cam 3 – cwblhau cyllideb y prosiect gydag amcanestyniadau incwm

Rydym ni wedi anfon templed cyllideb atoch trwy e-bost. Mae angen i chi gwblhau hwn, a'i uwchlwytho pan fyddwch chi’n cyrraedd 'Cam 5'.

Dylai eich cyllideb fanwl gael ei thorri i lawr yn ôl blwyddyn a chynnwys y canlynol:

faint o gyllid fydd yn mynd i bartneriaid, ac ar gyfer pa feysydd gwaith
cyllid arall sydd gennych chi neu yr ydych chi’n chwilio amdano, ar gyfer y prosiect hwn (gan gynnwys unrhyw benderfyniadau rydych chi’n aros i glywed amdanynt)
Manylion am swyddi a ariennir drwy'r prosiect, gan gynnwys:
- nifer a hyd y rolau, a'u cyflogau cyfwerth ag amser llawn
- p'un a ydynt eisoes yn y swydd neu a fyddant yn cael eu recriwtio
- pa bartner fydd yn eu recriwtio
amser a chost i bartneriaid prosiect fyfyrio a dysgu drwy gydol y prosiect
gwybodaeth ariannol gyflawn, gan gynnwys ffigurau a ragwelir ar gyfer y flwyddyn i ddod, i chi a'ch partneriaid.

Pan fyddwch chi’n dylunio ac yn datblygu eich cyllideb, dylech hefyd gynnwys amser ac adnoddau i gymryd rhan mewn gweithgareddau fel rhan o garfan derbynwyr grantiau y Gronfa Gweithredu Hinsawdd fel yr amlinellir yn yr adran 'Beth i'w ddisgwyl gennym ni'. Yn dibynnu ar fath a maint eich prosiect, dylech ddyrannu o leiaf un i ddau ddiwrnod y mis ar gyfer hyn.

Gallwn hefyd gefnogi costau capasiti neu ddatblygiadol i alluogi sefydliadau partner llai i gymryd rhan lawn mewn prosiectau. Mae rhagor o wybodaeth am y costau y gallwn ni eu cefnogi drwy'r cyllid hwn ar ein tudalen rhaglen.

Cam 4 – creu cynllun prosiect

Mae angen i chi gwblhau cynllun prosiect, a'i uwchlwytho pan fyddwch yn cyrraedd 'Cam 5'. Gallwch uwchlwytho'r cynllun ym mha bynnag fformat sy'n gweddu orau i chi. Ni ddylai cynlluniau ysgrifenedig fod yn hwy na 1,000 o eiriau.

Rydym ni eisiau deall beth fydd yn cael ei gyflawni a phryd, gan gynnwys:

llinell amser o brif weithgareddau'r prosiect
cerrig milltir y prosiect, canlyniadau ac allbynnau
pa bartneriaid fydd yn gwneud beth, a phryd.

Cam 5 – llenwi ffurflen ar-lein ac uwchlwytho eich dogfennau

Byddwn yn anfon dolen atoch i ffurflen ar-lein drwy e-bost. Nid oes rhaid i chi wneud y cyfan ar yr un pryd. Gallwch ei arbed a dod yn ôl ato os oes angen. Ar y ffurflen byddwn yn gofyn i chi am wybodaeth gan gynnwys:

manylion eich sefydliad
manylion eich prosiect
Prif fanylion cyswllt a manylion cyswllt Uwch aelod – gan gynnwys dyddiadau geni a chyfeiriadau cartref
dogfennau ategol gan gynnwys eich:
- ymatebion i'n cwestiynau - yn cael eu rhestru yng 'Ngham 1'
- cyfrifon blynyddol diweddaraf – yn cael eu disgrifio yng 'Ngham 2'
- cyllideb gyda amcanestyniadau incwm – yn cael eu disgrifio yng 'Ngham 3'
- cynllun prosiect – yn cael eu disgrifio yng 'Ngham 4'
- copi o'ch dogfen lywodraethol (os nad ydych chi’n elusen neu'n gorff statudol).

Beth i'w ddisgwyl gennym ni

Mae'r Gronfa Gweithredu Hinsawdd yn ymrwymiad 10 mlynedd gwerth £100m i rymuso ac ysbrydoli mwy o bobl ledled y DU i weithredu ar newid hinsawdd. Mae'r rhaglen yn galluogi cymunedau i gydweithio, rhannu eu dysgu, a bod yn gyfranogwyr gweithredol mewn symudiad ehangach o newid a'i nod yw creu mwy o dystiolaeth a gofod ar gyfer llunio polisïau cefnogol ar lefel leol a chenedlaethol, gan arwain at ddyfodol mwy gwydn a theg.

Dysgu Gyda'n Gilydd

Rydym ni’n cynnig cyfleoedd ar gyfer datblygu a chyd-ddysgu i'r holl brosiectau rydym ni’n eu hariannu drwy'r Gronfa Gweithredu Hinsawdd.

Bydd prosiectau llwyddiannus yn ymuno â grŵp o brosiectau arweiniol cymunedol, lleol, cenedlaethol a ledled y DU. Mae'r prosiectau hyn yn rhannu uchelgais, ymrwymiad a phenderfyniad i ysbrydoli cymunedau i weithredu ar newid hinsawdd a mabwysiadu ymddygiadau sy'n amgylcheddol gynaliadwy. Eu helpu i lunio dyfodol cynaliadwy a gwella bywydau pobl.

Gyda chefnogaeth partneriaid dysgu, rydym ni’n trefnu cyfleoedd rheolaidd i ddod ynghyd, hyd yma mae hyn wedi cynnwys digwyddiadau chwarterol (ar-lein), boreau coffi a sesiynau rhwydweithio i greu cysylltiadau a rhannu arfer da. Fel rhan o'r grŵp, bydd disgwyl i chi gymryd rhan a chyfrannu at y digwyddiadau hyn. Rhowch adnoddau o'r neilltu ar gyfer hyn (e.e. amser, cyllideb a disgwyliadau rolau).

Casglu Tystiolaeth

Rydym ni wedi ymrwymo i rannu tystiolaeth a dysgu a gynhyrchir gan raglen gyffredinol y Gronfa Gweithredu Hinsawdd am weithredu dan arweiniad y gymuned gyda deiliaid grantiau ar draws y Gronfa, cymunedau, llunwyr polisi a'r sector ehangach gan gynnwys arianwyr eraill.

O ystyried yr amrywiaeth eang o brosiectau rydym ni’n eu hariannu, nid ydym wedi mabwysiadu dull rhagnodol o gasglu a gwerthuso tystiolaeth. Ni ddisgwylir i brosiectau fesur na gwerthuso popeth yn eu prosiect. Ond, rydym ni’n disgwyl i bob prosiect a ariennir fod â chynlluniau cynhwysfawr ar waith i gynhyrchu tystiolaeth ar y gwahaniaeth maen nhw’n ei wneud.

Unwaith y flwyddyn, byddwn yn gofyn am wybodaeth gyson am yr holl brosiectau am eich nodau a'ch gweithgareddau (dangosyddion monitro allweddol). Mae'r rhain yn feintiol ac ansoddol. Byddwch ond yn darparu gwybodaeth sy'n berthnasol i'ch prosiect chi. Bydd hyn yn rhoi mewnwelediad i sut olwg sydd ar weithredu ar newid hinsawdd dan arweiniad y gymuned ar draws y rhaglen.
Ddwywaith y flwyddyn byddwn yn gofyn i chi ddweud wrthym ni sut mae eich prosiectau'n mynd - gan gynnwys yr hyn rydych chi'n ei ddysgu a'r gwahaniaeth mae eich gweithredu dan arweiniad y gymuned yn ei wneud.
Drwy gydol eich prosiect, byddwn yn gofyn i chi gymryd rhan mewn ymchwil wedi'i dargedu ar bynciau, cwestiynau neu themâu blaenoriaeth. Er enghraifft, ymchwilio a rhannu dysgu ar feysydd pwnc penodol sy'n berthnasol i'ch prosiect megis ymgysylltu ag awdurdodau lleol, amrywiaeth cydraddoldeb ac arferion cynhwysiant.

Yn dibynnu ar fath a maint eich prosiect, dylech ddyrannu o leiaf dau ddiwrnod y mis i gasglu tystiolaeth am eich prosiect. Efallai y bydd rhai prosiectau yn gofyn am rolau ac arbenigedd mwy neu ymroddedig. Er enghraifft, prosiectau mawr neu gymhleth, neu'r rhai sy'n canolbwyntio'n benodol ar arloesi neu ddulliau newydd. Mae'n bwysig adeiladu'r cam casglu tystiolaeth hwn i’ch cynlluniau a'ch cyllidebau.

Ysbrydoli Eraill

Byddwn yn darparu cyfleoedd, offer ac adnoddau hyfforddi i'ch cefnogi i lunio eich stori o newid a'ch galluogi i estyn allan at gynulleidfaoedd amrywiol ac ysbrydoli eraill i weithredu.

Wrth ddylunio a datblygu eich cyllideb, rhaid i chi ystyried yr amser a'r adnoddau sydd eu hangen i chwarae rhan weithredol yn y gweithgareddau lefel rhaglen a amlinellir uchod i sicrhau eich bod chi’n manteisio i’r eithaf ar y cynnig hwn.

Pethau eraill i'w hystyried ar gyfer eich cais

Bydd pob partneriaeth yn wahanol yn dibynnu ar y partneriaid a sut maen nhw’n cytuno i gydweithio. Dylai pob partneriaeth allu dangos sgiliau, profiad, gallu ac ymrwymiad cyfunol i gyflawni'r prosiect. Ac ystyried sut y gall grwpiau llai gymryd rhan a'u cefnogi. Dylai eich partneriaeth gynnwys y cymunedau rydych chi'n gweithio gyda nhw. Dylech chi eu cynnwys wrth ddylunio a chyflwyno eich prosiect, a sicrhau eu bod yn parhau i gael dweud eu dweud am sut mae'r prosiect yn gweithio. Er enghraifft, gallech chi gynnwys grwpiau cymunedol lleol llai, neu gynnwys pobl sydd â phrofiad byw o'r mater rydych chi’n gweithio arno.

Dylai partneriaethau hefyd gynnwys:

cytundeb ar sut y dylid gwneud a chyfathrebu penderfyniadau allweddol
rolau a chyfrifoldebau wedi’u nodi’n glir ac y cytunwyd arnynt ar gyfer pob partner.

Rydym ni’n derbyn dau strwythur cyfreithiol ar gyfer partneriaethau gan gynnwys:

sefydliad partner arweiniol - sy'n ymrwymo i gytundebau partneriaeth â thrydydd partïon, sydd wedyn yn dod yn is-dderbynwyr grant.
grŵp o sefydliadau sy'n gweithio gyda'i gilydd ond sy'n ffurfio cytundebau grant ar wahân gyda ni.

Byddwn ni angen cytundebau ysgrifenedig sy'n rhwymo'n gyfreithiol.

Os ydym ni’n ariannu partner arweiniol, rydym ni’n ei gwneud yn ofynnol i bob partner prosiect ymrwymo i gytundeb partneriaeth sy'n rhwymo'n gyfreithiol fel rhan o'n telerau ac amodau. Nid oes angen i chi anfon cytundeb partneriaeth atom gyda'r cais hwn. Ond byddwch angen un os byddwn ni’n rhoi grant i chi a chyn i'r prosiect ddechrau.

Rhaid i'r rhain nodi'r rolau a'r cyfrifoldebau a sicrhau bod bob partner yn glynu at y telerau ac amodau. Nid ydym yn creu nac yn adolygu cytundebau ar gyfer trydydd parti.

Os ydym yn ariannu grŵp o sefydliadau, rydym ni’n disgwyl i bob deiliad grant fod yn ddarostyngedig i'n telerau ac amodau. Byddem hefyd yn disgwyl memorandwm cyd-ddealltwriaeth rhwng y partneriaid sy'n nodi disgwyliadau ynghylch rolau, cyfrifoldebau a threfniadau llywodraethu, gan gynnwys rôl Cronfa Gymunedol y Loteri Genedlaethol.

Dweud wrthym ni am unrhyw drefniant partneriaeth presennol yn eich cais.

Os oes strwythur partneriaeth eisoes ar waith, dylech ddweud wrthym ni yn eich cais. Rydym ni eisiau gwybod am y trefniadau presennol sydd ar waith (allai gael eu gorfodi’n gyfreithiol neu fel arall). Os oes angen, efallai y bydd angen gwelliannau i'r trefniadau presennol neu berthnasoedd cyfreithiol newydd.

Templed cytundeb partneriaeth.

Gallwn roi templed cytundeb partneriaeth i chi, neu gallwch greu eich templed eich hun. Efallai y bydd y templed yn ddefnyddiol os oes gennych chi un partner arweiniol — y partner sy'n cael yr holl gyllid ac yn trosglwyddo peth ohono ymlaen i'r partneriaid eraill.

Mae ein templed fel canllaw yn unig ac ni allwn roi cyngor cyfreithiol i chi. Dylech gael eich cyngor cyfreithiol eich hun cyn llofnodi unrhyw gytundeb os nad ydych chi’n siŵr. Os hoffech chi dderbyn y templed hwn, dylech ofyn i'ch Swyddog Portffolio.