Camau Cynaliadwy Cymru - Grantiau Egin

We mind the gap
  1. Ariannu
  2. Rhaglenni ariannu
  3. Camau Cynaliadwy Cymru - Grantiau Egin

Hoffem helpu grwpiau cymunedol yng Nghymru sy'n dechrau gweithredu ar newid hinsawdd ac eisiau byw mewn ffordd fwy cynaliadwy. Bydd yr arian hwn yn helpu grwpiau sy'n derbyn cefnogaeth gan raglen fentora Egin, i roi hwb i'w syniadau.

Ardal
Cymru
Yn addas ar gyfer
Grwpiau sydd wedi derbyn mentora gan Egin (gwasanaeth mentora Camau Cynaliadwy Cymru) ac sydd wedi cwblhau cynllun gweithredu.
Cyfanswm ar gael
£3.75 miliwn dros 5 mlynedd
Terfyn amser ymgeisio

Parhaus

Sut i wneud cais

Sut i wneud cais

Cysylltwch â ni am ffurflen gais

I wneud cais am yr arian hwn, rhaid i chi fod:

Gallwch wneud cais am grant hyd at £15,000. Mae'r arian hwn ar gael gyda diolch i Ariannu Asedau Segur.

Gallwch weld rhestr lawn o gwestiynau o'r ffurflen gais.

Beth sy'n digwydd ar ôl i chi wneud cais

  1. Ar ôl i chi anfon eich cais atom, byddwn yn cysylltu â chi gyda phenderfyniad mewn tua phedair wythnos

    Byddwn yn edrych ar eich syniad ac yn cynnal gwiriadau ar y wybodaeth rydych chi'n ei darparu i ni. Gallwch ddysgu rhagor am y gwiriadau y byddwn yn eu cynnal ar eich gwybodaeth.

    Efallai y byddwn yn eich ffonio yn ystod y pedair wythnos hynny, i siarad mwy am eich syniad neu ofyn am fwy o wybodaeth.

    Os bydd eich cais yn llwyddiannus, byddwn yn anfon e-bost atoch gyda'r newyddion da. Ar ôl i chi anfon eich cyfriflen banc atom, byddwn yn rhoi'r arian yn eich cyfrif banc o fewn 14 diwrnod.

  2. Gallwch ddechrau eich prosiect

    Byddwch chi'n penderfynu pryd rydych chi am ddechrau eich prosiect, cyn belled â'i fod o fewn tri mis i'r dyddiad pan wnaethom gynnig yr arian. Os nad ydych chi'n siŵr, gallwch siarad â'ch swyddog ariannu amdano. Dylech wario'r arian fel y nodwyd yn eich cais (oni bai ein bod wedi cytuno i rywbeth gwahanol yn gyntaf).

    Efallai y byddwn yn cysylltu â chi o bryd i'w gilydd – i weld sut mae pethau'n mynd. Gofynnir i chi ddarllen a chytuno i'r Telerau ac Amodau.

  3. Rhannwch eich stori

    Gallwch ddweud wrth eich cymuned leol, rhannu eich newyddion da ar y cyfryngau cymdeithasol, neu gysylltu â phapurau newydd lleol. Byddwn yn gwneud cyhoeddiad i'r wasg ac yn rhannu eich stori hefyd.

    Gallwch hefyd lawrlwytho logo i'w ddefnyddio i ddangos bod gennych grant Camau Cynaliadwy Cymru.
Pwy all wneud cais

Gallwch wneud cais os yw un o'ch grŵp yn:

  • elusen gofrestredig
  • sefydliad gwirfoddol neu gymunedol
  • sefydliad corfforedig elusennol (CIO)
  • cymdeithas gydweithredol (os oes ganddi gymal nid-er-elw)
  • cwmni cyfyngedig trwy warant (os oes ganddo gymal nid-er-elw).
  • cwmni buddiant cymunedol
  • cymdeithas budd cymunedol
  • sefydliad gwirfoddol neu gymunedol heb ei gofrestru
  • cyngor tref a chymuned (ar yr amod bod cefnogaeth gref gan y gymuned i'r syniad gael ei ddatblygu)
  • ysgol (cyn belled â bod eich prosiect yn elwa ac yn cynnwys y cymunedau o amgylch yr ysgol)
  • grŵp ffydd.

Mae croeso i bartneriaethau o bob sector wneud cais, cyn belled â bod y prif ymgeisydd yn un o'r mathau o sefydliadau a restrir uchod. Rhaid i'ch sefydliad gael pwyllgor rheoli gydag o leiaf ddau aelod nad ydynt yn gysylltiedig, 18 oed neu'n hŷn.

Rhaid i'r grŵp sy'n gwneud cais am grant:

  • fod wedi derbyn mentora gan raglen fentora Egin
  • bod wedi cwblhau cynllun gweithredu
  • cael o leiaf dau berson nad ydynt yn gysylltiedig ar eu bwrdd neu bwyllgor, a
  • cael cyfrif banc neu gyfrif cymdeithas adeiladu yn y DU yn enw cyfreithiol eich sefydliad. Rhaid i hyn gael o leiaf ddau berson nad ydynt yn gysylltiedig sy'n gallu rheoli'r cyfrif.

Trwy hynny, rydym yn golygu pobl nad ydynt:

  • yn perthyn i’w gilydd trwy waed
  • yn briod â'i gilydd
  • mewn partneriaeth sifil â'i gilydd
  • mewn perthynas hirdymor â'i gilydd
  • yn byw gyda'i gilydd yn yr un cyfeiriad.
Y prosiectau y byddwn yn eu hariannu

Y prosiectau y byddwn yn eu hariannu

Hoffem helpu grwpiau cymunedol yng Nghymru sy'n dechrau gweithredu ar newid hinsawdd a byw mewn ffordd fwy cynaliadwy. Bydd ein hariannu yn helpu grwpiau sy'n derbyn cefnogaeth gan Egin i roi hwb i'w syniadau.

Byddwn yn ariannu amrywiaeth o brosiectau ledled Cymru. Er enghraifft, gallai prosiectau ymwneud â bwyd, trafnidiaeth, ynni neu wastraff a defnydd.

Prif ffocws eich prosiect dylai fod ymgysylltu â newid hinsawdd a byw mewn ffordd fwy cynaliadwy.

Ond hoffem hefyd wybod am fanteision eraill eich prosiect. Gallai'r rhain gynnwys pethau fel gwella lles pobl, gwella perthnasoedd rhwng pobl a sefydliadau, neu wella bioamrywiaeth.

Hoffem ariannu prosiectau sydd wedi meddwl am yr effaith y bydd eu gweithgareddau yn ei chael ar fyd natur a, lle bo hynny'n bosibl, cyfyngu ar unrhyw beth sy'n niweidiol.

Rydyn ni eisiau ariannu prosiectau a fydd yn rhannu'r hyn maen nhw wedi'i ddysgu ag eraill. Byddwn yn ariannu sefydliadau sydd eisiau dysgu, ac sy’n bwriadu rhannu'r hyn maen nhw'n ei ddysgu gyda grwpiau tebyg.

Rydym yn annhebygol o ariannu

Prosiectau na fydd yn:

  • helpu pobl i newid y ffordd maen nhw'n ymateb i'r argyfwng hinsawdd neu fyw mewn ffordd fwy cynaliadwy.
  • canolbwyntio'n ddigon cryf ar newid hinsawdd, hyd yn oed os bydd manteision eang i'ch cymuned neu i les pobl.
  • cynnwys y gymuned i ddatblygu'r syniad.

Os yw'ch prosiect yn canolbwyntio ar les, efallai y byddai'n well gennych wneud cais i’r rhaglenni ariannu hyn:

Beth allwch chi wario'r arian arno

Beth allwch chi wario'r arian arno

Rydym yn cynnig grantiau hyd at £15,000. Byddwn yn ariannu prosiectau am hyd at 24 mis.

Gallwn ariannu

  • rhan o'ch prosiect neu'ch prosiect i gyd
  • costau cyfalaf
  • costau refeniw.

Gallai costau cyfalaf gynnwys:

  • prynu offer
  • adnewyddu neu ddatblygu tir a gwaith adeiladu neu waith arall sy'n gysylltiedig ag adeiladu.

Gallwn hefyd ariannu costau cerbydau trydan. Gallwch ddarllen ein canllawiau ar grantiau ar gyfer cerbydau (PDF, 950KB).

Gallai costau refeniw gynnwys:

  • cyflogau staff y prosiect
  • treuliau gwirfoddoli
  • trafnidiaeth
  • costau cyfieithu
  • costau dysgu a gwerthuso.

Os oes angen grant arnoch ar gyfer prosiectau tir neu adnewyddu

Bydd angen i chi ddarparu:

  • dogfennau sy'n dangos eich bod yn berchen ar y tir neu'r adeilad, gall fod yn rhydd-ddaliadol neu’n lesddaliadol. Os yw'ch perchnogaeth yn lesddaliadol, rhaid i'r les fod am o leiaf bum mlynedd o'r adeg y byddwch yn cwblhau'r gwaith rydych chi am ei wneud ac ni ddylai fod unrhyw gymalau torri yn y ddogfen les.
  • tystiolaeth bod yr holl ganiatâd angenrheidiol ar gyfer datblygu a / neu ddefnydd yr eiddo wedi'u caffael
  • tystiolaeth bod o leiaf tri amcangyfrif wedi'u derbyn gan dri adeiladwr annibynnol.

Ni allwn ariannu

  • ymgyrchu
  • alcohol
  • gwneud elw
  • TAW y gallwch ei hawlio yn ôl
  • gweithgareddau sy'n disodli ariannu’r llywodraeth (cyn i chi wneud cais, dylech ymchwilio i ba gymorth sydd eisoes ar gael)
  • gweithgareddau gwleidyddol neu grefyddol
  • talu rhywun arall i ysgrifennu eich cais.

Gallwn ariannu rhywfaint o weithgarwch gwleidyddol ac ymgyrchu

Ond dim ond os:

  • nad yw'r gweithgaredd yn blaid wleidyddol. Mae hyn yn golygu bod yn rhaid iddo ymwneud â pholisi, ymarfer neu ddeddfwriaeth yn hytrach na gwrthwynebu neu gefnogi plaid wleidyddol.
  • bwriad y gweithgaredd yw helpu achos eich sefydliad a buddio’r cyhoedd neu'r gymdeithas.

Ni fyddwn yn ariannu prosiectau lle mai gweithgareddau gwleidyddol yw’r prif bwrpas. Ond gallwn ariannu prosiectau sy'n ymwneud yn bennaf ag ymgyrchu.