2023/24 Mynegai Ymchwil Cymunedol

  1. Mewnwelediad
  2. 2023/24 Mynegai Ymchwil Cymunedol

Arolwg blynyddol o dros 8,000 o oedolion o bob rhan o'r DU yw’r Mynegai Ymchwil Cymunedol. Mae'n datgelu meddyliau pobl am eu cymuned - gan gynnwys yr hyn sy'n eu gwneud yn falch, a'r hyn maen nhw'n poeni amdano - a sut hoffen nhw i'r dyfodol edrych.

Mae canlyniadau eleni yn dangos brwdfrydedd gwirioneddol pobl dros wirfoddoli, ymdeimlad o berthyn, ac awydd i chwarae rhan weithredol yn y gymuned. Mae'r canlyniadau hefyd yn dangos sut mae cymunedau'n ymateb i'r heriau presennol gan gynnwys costau byw cynyddol a'r argyfwng hinsawdd. Yn bwysig, rydym yn archwilio sut mae gan bobl wahanol flaenoriaethau yn dibynnu ar eu rhywedd, oedran, rhanbarth, gradd gymdeithasol ac ethnigrwydd.

Mae'r adroddiad yn archwilio canlyniadau ein Mynegai Ymchwil Cymunedol 2024 yn fanwl, gan dynnu sylw at y canfyddiadau allweddol, amrywiaeth yr ymatebion gan wahanol grwpiau, a'r hyn y mae'r canlyniadau'n ei ddweud wrthym am sut y gallwn gefnogi cymunedau'r DU drwy gydol 2024 ac i'r dyfodol.

Cynhaliwyd ymchwil ar gyfer yr adroddiad hwn gan Savanta, ar ran Cronfa Gymunedol y Loteri Genedlaethol, rhwng 6 Hydref a 13 Tachwedd 2023, gan siarad ag 8,976 o oedolion y DU a bwysolwyd i fod yn gynrychioliadol yn ôl rhywedd, oedran, rhanbarth, gradd gymdeithasol ac ethnigrwydd.

Dyddiad cyhoeddi
Ebrill 2024
Manylion cyswllt
pressoffice@tnlcommunityfund.org.uk

Uchafbwyntiau’r ymchwil

  • Mae pobl yn teimlo'n rhan o'u cymuned ledled y DU. Dywedodd o leiaf chwech o bob deg o bobl (61%) eu bod yn teimlo'n rhan o'u cymuned leol, ledled y DU ac ym mhob gwlad unigol.
  • Mae hanner y bobl yn bwriadu gwirfoddoli. Dywedodd y mwyafrif (64%) o bobl wrthym eu bod yn fodlon gweithio gydag eraill i wella eu hardal leol, gyda hanner (50%) yn bwriadu gwirfoddoli yn 2024.
  • Mae pobl yn teimlo'n gadarnhaol am eu cymunedau. Rhoddodd yr ymatebwyr sgôr ffafriol i'w hardaloedd lleol mewn categorïau gan gynnwys mynediad i fannau gwyrdd (80%), ansawdd bywyd cyffredinol (70%), a chyfleoedd addysg (68%).
  • Mae cymunedau wedi’u cymell i fynd i'r afael ag effeithiau newid hinsawdd. Dywedodd hanner (50%) wrthym eu bod yn teimlo cymhelliant personol i ymgysylltu â gweithredu hinsawdd, a dywedodd cyfran debyg wrthym eu bod yn optimistaidd bod modd atal yr effeithiau tymor hir gwaethaf o hyd (48%).
  • Mae pobl yn glir ynghylch eu blaenoriaethau i helpu ardaloedd 'ffynnu'. Dywedodd y mwyafrif o bobl wrthym eu bod am weld mwy o fynediad at dai fforddiadwy (58%) a llai o dlodi ac amddifadedd (57%).
  • Ymateb i gostau byw cynyddol yw'r brif flaenoriaeth ar gyfer lles cymunedol. Pan ofynnwyd beth oedd bwysicaf ar gyfer lles cymunedol, tair prif flaenoriaeth pobl oedd cymorth gyda'r cynnydd mewn costau byw (30%), gofalu am ei gilydd (25%), lleihau unigrwydd (23%), ac atal trais ymhlith pobl ifanc (20%).

2023/24 Mynegai Ymchwil Cymunedol (PDF 8 MB)

↑ Yn ôl i'r frig