Tri degawd o wneud gwahaniaeth

Ers lansio'r Loteri Genedlaethol ym 1994, rydym wedi rhoi dros £18.4 biliwn i gymunedau. Felly mae 2024 yn garreg filltir, yn gyfle i fyfyrio a dathlu. Yma rydym yn rhannu rhai o’r ffyrdd y mae’r arian hwn wedi gwneud gwahaniaeth, gan ddangos sut mae cymunedau wedi dod at ei gilydd i greu newid.

Mae rhai gwahaniaethau yn lleol neu'n bersonol. Mae coetir sydd wedi'i esgeuluso wedi dod yn ofod cymunedol ffyniannus, sy'n gartref i bopeth o gampfeydd awyr agored i deithiau cerdded hanes. Mae babanod wedi tyfu i fod yn ymddiriedolwyr y mudiadau a helpodd i roi’r dechrau gorau mewn bywyd iddynt. Er gwaethaf tywydd garw, mae plant ysgol yn Shetland wedi dysgu ffyrdd cyfeillgar i'r hinsawdd o dyfu eu llysiau eu hunain - hyd yn oed grawnwin a phlanhigion wy. O Belfast i Bowys, mae elusennau wedi helpu pobl i drawsnewid eu bywydau, a’u gweld yn rhoi yn ôl, gan gefnogi cymunedau yn eu tro.

Mae gan eraill gyrhaeddiad eang, boed hynny’n ymwneud â dylunio a darparu gwasanaethau iechyd meddwl cymunedol newydd, neu raglen sy’n rhoi cyfleoedd i 128,000 o bobl ifanc wella eu hamgylchedd lleol.

Mae’r adroddiad hwn yn rhannu straeon am gymunedau a gefnogwyd gan Gronfa Gymunedol y Loteri Genedlaethol a’r mudiadau a’i rhagflaenodd.¹ Fe welwch sut mae ariannu a arweinir gan y gymuned wedi grymuso pobl - gan eu helpu i weithredu ar yr hyn sy'n bwysig iddynt, adeiladu cysylltiadau, a chefnogi ei gilydd i ffynnu.

¹ Mae'r adroddiad yn cwmpasu ariannu gan Fwrdd Elusennau'r Loteri Genedlaethol, Comisiwn y Mileniwm, y Gronfa Gymunedol, y Gronfa Cyfleoedd Newydd, y Gronfa Loteri Fawr a Chronfa Gymunedol y Lotery Genedlaethol.

Argraffu'r dudalen hon