New £13 million National Lottery cash injection to support communities hit hardest by the rising cost-of-living

Mae Cronfa Gymunedol y Loteri Genedlaethol, cyllidwr mwyaf gweithgarwch cymunedol yn y DU, wedi cyhoeddi cyllid £13 miliwn hanfodol i gefnogi’r rhai sy’n cael eu heffeithio fwyaf gan gostau byw cynyddol. Bydd Buttle UK yn derbyn £10 miliwn a bydd Smallwood Trust yn derbyn £3 miliwn o arian y Loteri Genedlaethol fel rhan o ymrwymiad costau byw £75 miliwn a wnaed gan y cyllidwr eleni.

Mae Cronfa Gymunedol y Loteri Genedlaethol hefyd wedi datgelu canfyddiadau ymchwil newydd o’i Mynegai Ymchwil Cymunedol diweddaraf, sy’n dangos y dewisiadau anodd a’r newidiadau ymddygiad y mae’n rhaid i bobl a chymunedau eu gwneud er mwyn ymdopi â phwysau costau byw.

Mae’r arolwg o dros 8,000 o oedolion y DU yn dangos:

Mae dau draean (63%) wedi lleihau eu rhoddion i elusennau, neu’n credu efallai byddant yn gwneud hyn
Mae traean (33%) yn defnyddio banciau bwyd neu'n credu y gallai fod angen iddynt wneud hynny yn y dyfodol. Pobl ifanc sydd fwyaf dibynnol, gyda bron i chwarter (23%) o bobl ifanc 18 i 24 oed eisoes yn troi atyn nhw am gymorth
Mae 28% wedi hepgor prydau bwyd cyfan tra bod 18% yn rhagweld y gallai fod angen iddynt wneud hynny
Mae 44% naill ai eisoes wedi ceisio cyngor ar ddyledion a materion ariannol, neu efallai byddant yn cael eu gorfodi i wneud hynny dros y flwyddyn nesaf wrth i filiau cartref gynyddu
Mae dros hanner (54%) eisoes wedi lleihau eu gwariant ar hanfodion, fel bwyd a gwres, gyda menywod (59%) yn cael eu gorfodi i aberthu mwy o gymharu â dynion (49%).

Gyda £10 miliwn o gyllid y Loteri Genedlaethol, bydd Buttle UK yn cefnogi mwy na 12,000 o blant a phobl ifanc dros y pum mlynedd nesaf i oresgyn argyfwng, trwy ddosbarthu grantiau i elusennau a sefydliadau ledled Lloegr gan The Chances for Children Crisis Fund.

Bydd y grantiau Chances for Children hyn, gwerth tua £1,500 fesul teulu ar gyfartaledd, yn talu am hanfodion brys, yn ogystal â chymorth emosiynol ac ymarferol hanfodol yn fwy hirdymor. Bydd y grantiau’n talu'r costau ar gyfer pethau na fyddai pobl sy’n cael trafferth yn gallu eu fforddio fel arall. Gallai hyn fod yn unrhyw beth o wely ar gyfer plentyn sy'n cysgu ar y llawr, i gostau teithio a gliniadur fel bod person ifanc digartref yn ei arddegau’n gallu dechrau ei gwrs coleg cyntaf.

Bydd The Women’s Urgent Support Fund, a sefydlwyd gan Smallwood Trust gyda dros £3.2 miliwn o gyllid y Loteri Genedlaethol, yn galluogi 20,000 o fenywod ledled Lloegr i gael mynediad at wasanaethau cymorth arbenigol dros y pum mlynedd nesaf, drwy ddosbarthu grantiau i 60 o sefydliadau cymunedol lleol sy’n cael eu harwain gan fenywod a’u gwasanaethu ar eu cyfer.

Bydd y grantiau hyn yn galluogi sefydliadau menywod i fodloni’r cynnydd mewn galw am anghenion sylfaenol gan fenywod sydd â’r risg uchaf o dlodi. Byddant hefyd yn gwella capasiti sefydliadol trwy gyllid mwy hirdymor i helpu cryfhau’r capasiti ar gyfer gwasanaethau hanfodol – yn enwedig y rheini sy’n gweithio gyda menywod du ac ethnig lleiafrifol a/neu fenywod anabl – wrth i sefydliadau barhau i gefnogi menywod drwy’r heriau costau byw parhaus.

Dywedodd David Knott, Prif Weithredwr Cronfa Gymunedol y Loteri Genedlaethol: “Diolch i chwaraewyr y Loteri Genedlaethol, rydym wedi gallu ymrwymo £75 miliwn i gefnogi pobl ledled y DU gydag effaith costau byw cynyddol eleni. Mae'r £13 miliwn yr ydym wedi'i gyhoeddi heddiw yn gam mawr ymlaen tuag at gyflawni ein haddewid ac yn anfon neges gref ein bod ni yma i chi, ein bod yn gwrando, ac yn ymateb yn gyflym ac yn hyblyg. Rwy’n falch bod arian y Loteri Genedlaethol yn cefnogi cymunedau i ffynnu ac mae hyn yn bwysicach fyth yn ystod yr adegau anodd hyn.”

Dywedodd Joseph Howes, Prif Weithredwr Buttle UK: “Rydym yn gweld bod pethau wedi bod yn gwaethygu’n gynyddol i blant sy’n byw mewn tlodi. Fel y dengys yr ymchwil newydd hon, mae plant a phobl ifanc ledled y wlad yn wynebu heriau mawr yn sgil prisiau cynyddol ac effaith tlodi bwyd a thanwydd. Mae natur gylchol anawsterau ariannol a’i effaith ar iechyd meddwl plant a chanlyniadau addysgol ond yn mynd i waethygu wrth i’r cyfnod hwn o argyfwng barhau. Diolch i chwaraewyr y Loteri Genedlaethol, bydd Buttle UK yn gallu cyrraedd miloedd yn fwy o blant a phobl ifanc gyda chefnogaeth hollbwysig dros y pum mlynedd nesaf nag y byddem yn gallu ei wneud fel arall, a chynnig cyfle gwirioneddol am newid iddynt yn ystod cyfnod mor anodd.”

Dywedodd Paul Carbury, Prif Weithredwr Smallwood Trust: “Fel y dengys yr ymchwil newydd hon, mae menywod ledled y wlad yn wynebu heriau newydd yn sgil costau byw cynyddol. Mae ymchwil gyda’n partneriaid grant ein hunain hefyd wedi amlygu pryderon am les a staff sydd wedi’u gorlethu, sydd wedi dod trwy anterth y pandemig, ac sydd bellach yn wynebu heriau costau byw. Mae’r gronfa hon wedi dod ar adeg dyngedfennol ac mae nod Smallwood o fynd i’r afael â thlodi rhywedd yn fwy perthnasol nag erioed wrth i fenywod ymdopi â beichiau ariannol cynyddol. Diolch i chwaraewyr y Loteri Genedlaethol, bydd £3 miliwn yn cael ei fuddsoddi mewn sefydliadau rheng flaen sy’n darparu gwasanaethau achub bywyd i’r menywod mwyaf ymylol yn y DU ac yn gwella capasiti cyffredinol y sector menywod.”

Mae Cronfa Gymunedol y Loteri Genedlaethol yn dosbarthu arian a godir gan chwaraewyr y Loteri Genedlaethol, sy’n codi dros £30 miliwn yr wythnos at achosion da ledled y DU. Diolch i chwaraewyr y Loteri Genedlaethol y llynedd, dyfarnwyd dros hanner biliwn o bunnoedd (£588.2 miliwn) o gyllid trawsnewidiol i gymunedau ledled y DU gan Gronfa Gymunedol y Loteri Genedlaethol.

I ddysgu rhagor, ewch i www.TNLCommunityFund.org.uk

Dyddiad cyhoeddi: 9 Mawrth, 2023
Rhanbarth: Deyrnas Unedig

Nodiadau i Olygyddion

Cynhaliwyd yr ymchwil ar ran Cronfa Gymunedol y Loteri Genedlaethol gan Savanta ComRes rhwng yr 2il a’r 28ain o Dachwedd 2022, ymysg 8,968 o oedolion y DU wedi’i bwysoli i gynrychioli oedolion y DU yn ôl rhywedd, oedran, rhanbarth, gradd gymdeithasol ac ethnigrwydd.

Mae The Chances for Children Crisis Fund yn cael ei chefnogi gan £10 miliwn o gyllid gan Gronfa Gymunedol y Loteri Genedlaethol, i helpu plant a phobl ifanc i oresgyn argyfwng. Diolch i chwaraewyr y Loteri Genedlaethol, bydd £9.2 miliwn yn cael ei ddyfarnu mewn grantiau i elusennau a sefydliadau, gan gefnogi mwy na 12,000 o blant a phobl ifanc dros bum mlynedd (2023 – 2028). Bydd £800,000 yn cael ei ddefnyddio i dalu am gyflogau, a chostau rhaglen a gweinyddol.

Cefnogir The Women’s Urgent Support Fund gan £3,210,000 o gyllid gan Gronfa Gymunedol y Loteri Genedlaethol i ymateb i’r argyfwng costau byw. Diolch i chwaraewyr y Loteri Genedlaethol, bydd £3 miliwn yn cael ei ddyfarnu mewn grantiau i 60 o sefydliadau cymunedol lleol bach sy’n cael eu harwain gan fenywod a’u gwasanaethu ar eu cyfer, gan alluogi 20,000 o fenywod i gael mynediad at wasanaethau cymorth arbenigol hanfodol dros bum mlynedd (2023 – 2028). Bydd £210,000 yn cael ei ddefnyddio i dalu costau rhaglen a gweinyddol.

Ynghylch Cronfa Gymunedol y Loteri Genedlaethol

Ni yw cyllidwr mwyaf gweithgarwch cymunedol yn y DU – rydym ni’n cefnogi pobl a chymunedau i lwyddo a ffynnu.

Rydym ni’n falch i ddyfarnu arian a godwyd gan chwaraewyr y Loteri Genedlaethol i gymunedau ledled Lloegr, Yr Alban, Cymru a Gogledd Iwerddon, ac i gydweithio’n agos â Llywodraethau i ddosbarthu grantiau a chyllid hanfodol o raglenni a mentrau Llywodraethol allweddol.

Mae ein hariannu’n cael effaith gadarnhaol ac yn gwneud gwahaniaeth i fywydau pobl. Rydym ni’n cefnogi prosiectau sy’n canolbwyntio ar bethau sy’n bwysig, gan gynnwys ffyniant economaidd, cyflogaeth, pobl ifanc, iechyd meddwl, unigrwydd a helpu’r DU i gyrraedd Sero Net erbyn 2050.

Diolch i gefnogaeth chwaraewyr y Loteri Genedlaethol, mae ein hariannu ar agor i bawb. Mae’n fraint gennym i allu gweithio â’r grwpiau lleol lleiaf i elusennau DU-gyfan, gan alluogi pobl a chymunedau i ddod â’u huchelgeisiau yn fyw.

Mae chwaraewyr y Loteri Genedlaethol yn codi dros £30 miliwn yr wythnos* at achosion da ledled y DU. Ers i’r Loteri Genedlaethol ddechrau yn 1994, mae £43 biliwn wedi cael ei godi at achosion da**. Mae cyllid y Loteri Genedlaethol wedi cael ei ddefnyddio i gefnogi dros 635,000 o brosiectau - 255 o brosiectau fesul ardal cod post.

Gwefan │Twitter │Facebook │Instagram