Cael mwy o effaith ar gymunedau yn y blynyddoedd i ddod, meddai Cronfa Gymunedol y Loteri Genedlaethol

Mae Cronfa Gymunedol y Loteri Genedlaethol wedi cyhoeddi newidiadau i'w prif gynllun ariannu yn dilyn ymgynghori helaeth â chymunedau.

Bydd rhaglen ariannu Pawb a'i Le yn buddsoddi hyd at £20 miliwn y flwyddyn mewn cymunedau ledled Cymru, diolch i arian a godwyd gan chwaraewyr y Loteri Genedlaethol.

Yn dilyn lansiad ein strategaeth newydd - Cymuned yw’r man cychwyn, mae'r Gronfa wedi diweddaru ei chynnig ariannu i gefnogi cymunedau yng Nghymru. Mae Pawb a'i Le bellach yn gobeithio gwneud mwy o wahaniaeth yn y blynyddoedd i ddod drwy gael ei llywio gan bedair nod newydd y Gronfa, sy'n cefnogi cymunedau i:

ddod ynghyd
bod yn amgylcheddol gynaliadwy
helpu plant a phobl ifanc i ffynnu
galluogi pobl i fyw bywydau iachach.

Bydd grantiau o hyd at £500,000 ar gael. Bydd gofyn i grwpiau sy'n ymgeisio ddangos sut maen nhw wedi cynnwys y gymuned, ac wedi adeiladau ar sgiliau, profiadau a chryfderau pobl a dangos sut y maen nhw'n llenwi bwlch. Bydd gofyn i brosiectau hefyd ystyried effaith amgylcheddol eu gweithgareddau, mwy o fanylion Lleihau eich ôl troed amgylcheddol | Cronfa Gymunedol y Loteri Genedlaethol (tnlcommunityfund.org.uk)

Meddai John Rose, Cyfarwyddwr Cronfa Gymunedol y Loteri Genedlaethol, wrth gyhoeddi'r rhaglen newydd hon: "Rydyn ni'n gobeithio gwneud mwy o wahaniaeth yn y blynyddoedd i ddod ac i ganolbwyntio mwy ar ein pedair nod newydd sy'n cefnogi pobl i ddod ynghyd, i fod yn fwy amgylcheddol gynaliadwy, i helpu plant a phobl ifanc i ffynnu a galluogi pobl i fyw bywydau iachach.

"Byddwn yn rhoi mwy o sylw i daclo anghydraddoldeb, sy’n golygu y byddwn yn canolbwyntio mwy ar y bobl a’r cymunedau sy'n profi tlodi, anfantais a gwahaniaethu yng Nghymru. Byddwn hefyd yn cefnogi gweithredu amgylcheddol ar draws ein holl ariannu, gan fuddsoddi mewn cynaliadwyedd amgylcheddol a chefnogi prosiectau i ystyried yr amgylchedd hyd yn oed pan nad yw hynny'n brif ffocws y prosiect.

"Rydyn ni felly wedi diweddaru ein prif raglen ariannu, Pawb a'i Le, sy'n adeiladu ar ein strategaeth newydd Cymuned yw'r man cychwyn a'r ymgynghori a wnaethom gyda'r cyhoedd a rhanddeiliaid yng Nghymru yn gofyn iddynt beth fyddai eu prif flaenoriaethau i Gronfa Gymunedol y Loteri Genedlaethol yng Nghymru."

Un prosiect sydd eisoes yn canolbwyntio ar iechyd, yr amgylchedd a phobl ifanc yw prosiect Newid y Gêm ym Mhowys. Mae'r prosiect yn defnyddio £304,240 dros dair blynedd, er mwyn cefnogi pobl ifanc sy'n cael anawsterau ymgysylltu ag agweddau o addysg draddodiadol. Trwy'r prosiect maent yn meithrin sgiliau a chymwysterau, trwy weithgareddau ymarferol sy'n cynnwys sgiliau cefn gwlad, trin ceffylau, cadwraeth, mecaneg, gwaith coed, gwirfoddoli'n ddigidol, garddio a gofal anifeiliaid.

Meddai Sian Roberts, Cyfarwyddwraig Prosiect Newid y Gêm: “Rydyn ni’n creu cyfleoedd i bobl ifanc ym Mhowys godi eu dyheadau a’u hyder trwy ddarparu amgylchedd dysgu yn yr awyr agored lle gallent ddatblygu eu hyder a’u sgiliau er mwyn ffynnu a chyfrannu i ganolbarth Cymru

"Rydyn ni mor ddiolchgar i Gronfa Gymunedol y Loteri Genedlaethol am y grant sy'n ein galluogi i gynnal rhaglen o weithgareddau i'r bobl ifanc sy'n dibynnu ar y gwasanaeth. Rydyn ni’n gweithio mewn partneriaeth gyda mudiadau eraill, ysgolion a busnesau i sicrhau ein bod yn rhoi sgiliau gydol oes i bobl ifanc a fydd hefyd yn gwella eu rhagolygon gyrfa trwy roi sgiliau, hyder a chymwysterau iddynt."

Mae eleni'n nodi deg mlynedd ar hugain ers y tynnwyd peli'r Loteri Genedlaethol gyntaf ym 1994, a diolch i'r rhai sy'n chwarae'r gemau a chodi £30 miliwn i achosion da bob wythnos, mae dros biliwn wedi cael ei ddyfarnu i gymunedau ledled Cymru drwy 23,096 o grantiau yn ystod y cyfnod hwn.

Yn y bum mlynedd ddiwethaf yn unig, mae dros £117 miliwn wedi ei ddosbarthu drwy Pawb a'i Le i gymunedau ledled Cymru.

Anogir grwpiau sydd â syniadau am ariannu i gysylltu i drafod eu syniad ar 0300 12307335 neu e-bostio cymru@cronfagymunedolylg.org.uk

Am ragor o wybodaeth am yr holl ariannu sydd ar gael gan Gronfa Gymunedol y Loteri Genedlaethol ewch i https://www.tnlcommunityfund.org.uk/welsh/funding

Dyddiad cyhoeddi: 9 Hydref, 2024
Rhanbarth: Cymru

Nodiadau i Olygyddion

Ynghylch Cronfa Gymunedol y Loteri Genedlaethol

Ni yw’r cyllidwr cymunedol anstatudol mwyaf yn y DU – cymuned sydd wrth wraidd ein pwrpas, ein gweledigaeth a’n henw.

Rydym ni’n cefnogi gweithgareddau sy’n creu cymunedau gwydn sy’n fwy cynhwysol ac amgylcheddol gynaliadwy ac a fydd yn cryfhau cymdeithas ac yn gwella bywydau ledled y DU.

Rydym yn falch o ddyfarnu arian a godwyd gan chwaraewyr y Loteri Genedlaethol i gymunedau ledled Cymru, Lloegr, yr Alban a Gogledd Iwerddon, ac i weithio'n agos gyda'r Llywodraeth i ddosbarthu grantiau a chyllid hanfodol o raglenni a mentrau allweddol y Llywodraeth.

Yn ogystal ag ymateb i’r hyn y mae cymunedau yn ei ddweud wrthym sy’n bwysig iddynt, mae ein cyllid yn canolbwyntio ar bedair nod allweddol, gan gefnogi cymunedau i:

1. Ddod ynghyd

2. Bod yn amgylcheddol gynaliadwy

3. Helpu plant a phobl ifanc i ffynnu

4. Galluogi pobl i fyw bywydau iachach.

Diolch i gefnogaeth chwaraewyr y Loteri Genedlaethol, rydym yn dosbarthu dros £600 miliwn y flwyddyn trwy 13,000+ o grantiau ac yn bwriadu buddsoddi dros £4 biliwn o gyllid mewn cymunedau erbyn 2030. Mae'n fraint i ni allu gweithio gyda'r grwpiau lleol lleiaf hyd at elusennau DU-gyfan, gan alluogi pobl a chymunedau i ddod â'u huchelgeisiau’n fyw.

Mae chwaraewyr y Loteri Genedlaethol yn codi dros £30 miliwn bob wythnos at achosion da ledled y DU. Ers i'r Loteri Genedlaethol ddechrau yn 1994, mae £49 biliwn wedi cael ei godi ac mae mwy na 690,000 o grantiau unigol wedi cael eu rhoi ledled y DU – sy’n gyfwerth â thua 240 o grantiau Loteri Genedlaethol ym mhob ardal cod post yn y DU.