Pwyllgor Cymru

Cadeirydd Pwyllgor

Mae Dr Lowthe-Thomas yn gweithio i Awdurdod Parc Cenedlaethol Y Bannau Brycheiniog fel Cyfarwyddwr Adfer Natur a Newid Hinsawdd. Cyn hynny, hi oedd Prif Swyddog Gweithredol Asiantaeth Ynni Hafren-Gwy - elusen gynaliadwy sy'n gweithio yng Nghymru a siroedd y gororau. Yn flaenorol, roedd ganddi rolau lluosog yn y sefydliad hwnnw: is-lywydd Effeithlonrwydd Ynni a Thlodi Tanwydd yn Federene (Ffederasiwn Asiantaethau Ynni Ewrop). Enillodd ei PhD ym Mhrifysgol Caerdydd, gan astudio Cnydau Ynni a Biomas.

Roedd Dr Lowthe-Thomas yn un o sylfaenwyr Ynni Cymunedol Cymru a threuliodd ddeng mlynedd ym Mhrifysgol Caerdydd fel cydymaith Ymchwil.

Callum yw Cydlynydd Ymgysylltu a Gwirfoddoli Amgueddfa Cymru ac mae'n aelod o Fwrdd Cyfarwyddwyr Mess Up The Mess Theatre Company Ltd. Mae hefyd yn wneuthurwr ffilmiau ac yn hwylusydd llawrydd.

Mae gan Callum brofiad o gynrychioli lleisiau pobl ifanc yn ei rolau ar Fwrdd Cynghori Ieuenctid y Gronfa Gwaddol Ieuenctid, fel gweithiwr cymorth ieuenctid yng ngrwpiau ieuenctid YMCA Abertawe, ac wrth hwyluso gweithdy ymgynghori gyda phobl ifanc Grŵp Ieuenctid LHDTC+ GoodVibes.

Mae'n ymuno â Phwyllgor Cymru fel rhan o'n rhaglen Llais Ieuenctid, ymrwymiad i sicrhau bod lleisiau pobl ifanc yn cael eu cynnwys yn ein holl waith.

Gwenllian yw Prif Weithredwr Mudiad Meithrin, sefydliad gwirfoddol a phrif ddarparwr a galluogwr gofal ac addysg blynyddoedd cynnar cyfrwng Cymraeg yn y sector gwirfoddol, gyda dros 1000 o leoliadau ledled Cymru. Mae Gwenllian yn Ymddiriedolwr gyda Llyfrgell Genedlaethol Cymru ac mae’n gwirfoddoli yn ei Chylch Meithrin lleol ar y pwyllgor.

Yn hanu o Fangor yn wreiddiol, erbyn hyn mae hi wedi ymgartrefu gyda’i gŵr a’i phedwar o blant yn Llanerfyl, Sir Drefaldwyn. Astudiodd Ffrangeg a Sbaeneg yn Rhydychen cyn cwblhau gradd MScEcon a Doethuriaeth mewn Athroniaeth Wleidyddol ym Mhrifysgol Caerdydd lle bu hefyd yn diwtor gwleidyddiaeth.

Ar ôl cael ei hethol i gynrychioli Ward Glanyrafon ar Gyngor Sir Caerdydd yn 2004, cafodd ei phenodi’n Brif Weithredwr Plaid Cymru yn 2007. Gweithiodd hefyd fel Swyddog Cyhoeddiadau ar gyfer y Coleg Cymraeg Cenedlaethol ym Mhrifysgol Aberystwyth, lle’r oedd hi hefyd yn gyfrifol am ei gyfnodolyn ymchwil, ‘Gwerddon’.

Fadhili yw Cyfarwyddwr Panel Cynghori Sub-Sahara, rhwydwaith o gymunedau Affricanaidd yng Nghymru sy’n gweithio mewn datblygiad rhyngwladol ledled Cymru. Mae Fadhili’n rheoli tîm sy’n gweithio ar brosiectau lleol a rhyngwladol (yn bennaf yn yr Affrica Sub-Saharan).

Mae hefyd yn Sylfaenydd ac yn Gyfarwyddwr Watch-Africa Cymru: Gŵyl Ffilm Affricanaidd Cymru. Wedi iddo ddechrau’r ŵyl yn 2013, mae wedi tyfu i ddod yn un o brif wyliau Cymru sy’n canolbwyntio ar sinema Affricanaidd. Ynghyd â rhedeg y prosiectau hyn, mae Fadhili yn Gymrawd Celf ar gyfer Cyngor Celfyddydau Cymru a Chymrawd RSA. Yn rhedwr brwd, pêl-droediwr ac yn mwynhau dadl iach.

Trystan Pritchard yw Prif Weithredwr Hosbis Dewi Sant yn Llandudno, Gogledd Cymru. Mae’r hosbis yn darparu gofal diwedd oes yng Nghonwy, Gwynedd ac Ynys Môn.

Yn flaenorol, treuliodd Trystan sawl blwyddyn fel Pennaeth Cyfathrebu Bwrdd Iechyd mawr. Cafodd ei benodi wedi hynny i rôl uwch mewn llywodraeth leol i ddatblygu rhaglenni partneriaeth strategol ar draws iechyd a gofal cymdeithasol, plant a phobl ifanc a diogelwch cymunedol.

Ar hyn o bryd, mae Trystan yn Aelod o Fwrdd Gofal Cymdeithasol Cymru a Chyngor Gwirfoddol Mantell Gwynedd. Mae’n gyn-gadeirydd pwyllgor Cyngor ar Bopeth Cymru.

Y tu allan i’r gwaith, mae Trystan yn mwynhau treulio amser â’i deulu, rygbi Cymru a mynydda.

Mae Dr Victoria Winckler wedi bod yn Gyfarwyddwr Sefydliad Bevan ers 2002. Dros y 40 mlynedd diwethaf mae hi wedi gweithio ar lefel uwch yn y trydydd sector, llywodraeth leol ac addysg uwch, sydd wedi rhoi dealltwriaeth ddwys iddi hi o gyd-destun gwleidyddol, cymdeithasol a diwylliannol Cymru.

Mae Victoria wedi ymrwymo'n gadarn i'r sector gwirfoddol a chymunedol, ar ôl gweithio ynddo am dros 20 mlynedd ac mae hi wedi gwasanaethu ar lawer o fyrddau elusennol a di-elw. Mae hi'n siarad yn rheolaidd mewn cynadleddau a seminarau, yn aml yn rhoi tystiolaeth lafar i Bwyllgorau'r Senedd, yn cyflwyno gweminarau a hyfforddiant, ac yn cyfrannu at radio a theledu.

Kate Young yw Cyfarwyddwr y Fforwm Cymru Gyfan i Rieni a Gofalwyr, sef y rhwydwaith cenedlaethol ar gyfer gofalwyr teuluol pobl ag anableddau dysgu, sy’n ymgysylltu â dros 4,000 o deuluoedd ledled Cymru.

Kate yw Is-gadeirydd Cynghrair Cynhalwyr Cymru a chynrychiolydd Iechyd a Gofal Cymdeithasol ar gyfer y Trydydd Sector yng Nghymru ar y Cyngor Partneriaeth. Mae’n rhan o sawl Grŵp Cynghori’r Gweinidog a fforymau polisi sy’n trafod pynciau fel taliadau uniongyrchol, Byrddau Partneriaeth Rhanbarthol, Eiriolaeth, Arolygu Gwasanaethau ac yn fwyaf diweddar, Bwrdd Rhanddeiliaid Brechlyn Covid i Gymru. Bu Kate hefyd yn Gadeirydd Pobl yn Gyntaf y Fro am ddeng mlynedd ac yn Ymddiriedolwr Cymru ar gyfer Cronfa’r Teulu y DU am bum mlynedd.

Mae gan Kate ddealltwriaeth gadarn o’r weinyddiaeth ddatganoledig yng Nghymru a’r cyfleoedd a heriau diwylliannol, cymdeithasol ac economaidd y mae’n ei chynnig i gymunedau. Mae ganddi ymrwymiad cryf i’r syniad bod cymunedau wrth wraidd newid, gan gredu bod ein natur unigryw ac amrywiol fel gwlad, pan fyddwn yn dod ynghyd, yn rym gwirioneddol dros newid, arloesi a chynhwysiant.

Mae’n eiriolwr angerddol dros hawliau a dewis personol, gyda diddordeb arbennig mewn anabledd, gofalwyr a chydraddoldeb. Fel gofalwr i’w brawd sy’n byw ag anableddau dysgu difrifol ac awtistiaeth, mae ganddi ddealltwriaeth bersonol a phrofiad bywyd o fodel cymdeithasol anabledd a’r problemau anghydraddoldeb o fewn cymdeithas yng Nghymru.